كلّ عام و انت .. أمّي

تخجل الورود امام جمال عينيها 
تذبل الزّهور حين تقبّل شفتيها 
أ من الإنس انتِ ام من حوريّات الجنّة 
أ حقيقة أنتِ ام خيال رافقني طوال هذه المدّة 
ألمِسُكِ و اتوه في عينيك السّوداوان 
أستنشق رائحتك التي خجل من عطرها الرّيحان 
ماذا عساي اقول لأصف كمالك 
هل كتاباتي كافية لوصف جمالك ؟ 
هل في وسع كلماتي إرجاع جزء من جمائلك 
اللتي اغرقتني في بحرها 
هل في إمكاني إرضاء المرأة التي غمرتني بعطفها 
اللتي منحتني قلبها و عقلها و كيانها 
اللتي بدءت حياتي في أحشائها 
و لكم اتمنّى ان تنتهي و أنا في احضانها 
مرأة كانت لي الملجأ و المأوى 
مرأة كلّما احسست بالضعف ارتميت بين يديها
لتقنعني انّي من كلّ الظروف اقوى
مرأة كلّما شعرت بخوف اسكنتني في قلبها 
و كلّما شعرت ببرد أخذتني إلى صدرها 
كيف عساي أعبّر لك عن امتناني 
ماذا افعل لأجعلك تدركين انّي بدون وجودك 
تتلاشى آمالي ، تموت احلامي ، تزداد آلامي 
كلّ عام و أنتِ منقذتي من غدر الايّام 
كلّ عام و أنت مثلي الأعلى و رمز الإقدام 
كلّ عام و انت لي .. كلّ عام و انت .. أمّي

اتلاشى كالظلام حين تعانقه اشعّة شمس فجر جديد
اتوه في غابة الاوهام 
اغرق في نهر الاحلام 
و اجول ، اركض ، اسرع ثمّ .. اسكت 
استمع الى دقّات قلب قتلته الاعوام 
انصت الى انفاس متقطّعة خنقتها الايّام
اجتمع انفاسي و اركض ، اصيح علّي اخرج ما بداخلي من آلام
علّي ازيح هذا الحمل من على صدري 
ولكن .. محال 
محال ان اتخلّص من شيء رافقني منذ صغري 
كبرت و كبر معي 
كان اكثر الرفاق وفاءً لي 
لم يتركني حتّى في لحظات البهجة 
لكم تمنّيت ان يرحل عنّي 
ان يترك للفرح مجال ليتقرّب منّي 
ليعفو عنّي 
يا المي لم استطع ان اتخلّى عنك 
فتنازل انت و تخلّى عنّي 
حررني منك ، دعني اضحك ، ابتسم ، اغنّي 
دعني اقتلك ! اقتلعك من داخلي 
دعني احرقك و اشاهدك تتلاشى 
كما تلاشيت انا من حياتي بسببك 
كما تبخّرت احلامي البسيطة امام جبروتك 
دلّني على طريق الخروج من ملكوتك 
ناولني مفتاح هذا القفص الذي ابقاني تحت طاغوتك 
ردّ لي جناحيّ ، ردّ لي عقلي ، ردّ لي الابتسامة
 التي منها حرمتني
ارحمني و زِح همومك عنّي 
اختر غيري فانا لست منك و انت لست منّي 
دعك عنّي ..

.. رحلة الى النّسيان

اجول و حدي في ظلّ ليلة غائمة 
ابحث عن نفسي او عن قطعة من احلامي الغائبة 
وحيدة اركض تحت زخّات المطر التي تداعب شفتيّ
تحرّكني رياح غاضبة لتأخذني إلى .. إلى اين ؟
ليتك تأخذينني الى النّسيان 
ليتك تتحولين الى اعصار جارف 
لعلّي ارتاح من هذه الآلام ، لعلّي اكفّ عن الهذيان 
و سوف تسألينني ايّ آلام هذه التي تجعلكِ تتمنّين هذا الآن ؟ 
و لكنّي لن اجد اجابة ترضيكِ و ترضيني 
هل لأنّي لا اعرف نفسي ؟ 
هل لأنّي مازلت ابحث عن معنى لوجودي ؟
لقد كنت اخدع نفسي و أخدع من يحيط بي بآبتساماتي 
جعلتهم يظنّون أنّ لا شيء اغلى من حياتي 
كذبت ، تهت ، احترت .. 
سئمت من حياة لا تعني لي شيئا 
ضجرت من انتظار موت لا تنوي مجيئا 
هل من مخرج ؟ هل من مفرّ ؟
هل سيأتي يوم اقف فيه تحت المطر 
لأذوب كطعة سكّر ، كالثلج على سفح الجبل ..
وها أنا اضحك ، استهزء بنفسي 
ألومها ، و لكن لماذا ؟ لأنّي لم افهمها 
أحتقرها لأنها حرمتني من متعة اكتشافها 
منعتني من معرفة سبب بؤسها و احزانها 
ابعدتني عن اقرب الطرق للغوص في كيانها 
لعلاج جروحها التي سبّبها الزّمن 
لإيجاد مخرج من هذا الضياع 
و توقّفت المطر .. و احسست كأن قطعة من جسدي 
اقتلعت ، تبخّرت ، زالت عن الوجود 
و مع بزوغ اشعّة النّور من وراء الظلام الذي 
تمنّيت ان لا يزول 
احسست انّي لا انتمي إلى هذا الوجود 
احسست انّ هذا الكون لا يسعني ، 
انّ الخوف من الاندماج يمنعني 
من ان اجد نفسي وسط هذا الزّحام 
زحام الافكار و المشاعر 
زحام الألم و الخوف من الآخر 
متى تحين ساعة اللقاء بكِ يا نفسي 
يا معذبتي ، يا سارقة نومي و سبب بؤسي ..

قاعدة والا واقفة .. ماعندك وين داخلة

الارهاب طلّ من راس الجبل 
قال تونس ، تونس هيّ الحلّ 
باش نخلّطوك عاللي سبقوك 
باش نفجّرو اللي يزوروك 
باش نقتلو اللي يحبّو يحميوك 
يا ارهابي منين جابوك ؟
علاش بعثوك ؟ و قدّاه خلّصوك ؟ 
زعما هاذا الكلّ جهاد ؟ 
والا شماتة في العباد ؟ 
لا قاعدة ، لا راقدة لا متّكية 
تونس ديما واقفة و باش تقعد واقفة
على سقّيها واقفة ، على قلوبنا قاعدة و على ريوسنا متّكية
منين جيتو يا قوم الجهاد و الرّجعيًة 
و علاش توّ ؟ توّ برك هداكم ربّي للثنيّة ؟
بلاصتكم موش لهنا ، و ماكمش باش ترقدو مع ال 72 حوريّة 
تونس ماهيش باش تولّي تونستان 
و ماهيش باش تجي تحت يديكم يا اهل الجهل و النّكران ..

لشكون تشكي يا تونس ..

يا تونس يا للاّت الملوك 
شبيهم بين ليلة و نهار هزّوك و نفضوك ؟ 
شبيهم اللي هاذا ولّا يشري في الشبوك ؟
و انتي جيت في الوسط ، ياخي هوما امّك والا بوك ؟
حرت فيهم و حرت معاك و ملقيتش كيفاش باش نرجعوك 
معزّة مكرّمة لا يحكم فيك لا مالك و لا مملوك 
قبل كنت تعاني من سارق و تو جاوك اللي باش يشنقوك 
النّاس اللي تخبز و النّاس اللي تڨعرهم و الزّوز في شعبك كرّهوك 
ناس دخّلتّك في حيط و ناس بين نارين علّقوك 
نار الحرّية و نار عبادك اللي ماحبّوش يتوحّدو باش للدّيمقراطيّة يوصّلوك 
بدموعك يا تونس باش يطفّيو النّار اللي بيها شعّلوك 
اما اناهي النّار ؟ نار اللي يستغلّو في الدّين باش في جيبهم يحطّوك ؟ 
والا نار الكلاشات اللي بدات تخبط و بيها خنقوك ؟
يا تونس شكون يدوّر فيك ؟ شكونهم هاللي ماهمش ناويين يسيّبوك ؟
شكونهم هاللي قسّمولك شعبك ، عباد معاهم و عباد عمرهم ما يخونوك ؟
يا تونس غصّتي في قلبي و نحب نشكيلك اما يزّيك مالمشاكل اللي تعّبوك 
اشكيلي انتي ، احكيلي ، ابكيلي ، خلّينا مرّة وحدة في تاريخك نوحّدوك 
آه يا تونس جا النهار اللي فيه مرمدوك 
كان جيت في بلاصتك راني نطقت ، حلّفتك بترابك الغالي قلّنا كيفاش نخدموك 
عيّط ، صيح ، قلنا كيفاش من هالحالة نخرّجوك 
تعبنا و تعّبناك معانا و حرنا كيفاش نصونوك 
زعما يجي نهار و للضّو نخرّجوك ؟ 
والا باش نقعدو طول عمرنا في الظّلمة نحبّوك ؟
وقتاش يجي النّهار اللي فيه تقوللنا مبروك 
مبروك عليكم بلادكم و تسامحنا و في قلوبنا نسكّرو عليك و نخبّيوك 
سامحنا يا تونس رانا لتو لانا عارفين وين باش نهزّوك ..

تونستان

(انا عرفان ابن عبد الله مسلم قاطن بالخلافة الاسلامية تونستان القائمة سنة 2011 بعد احداث 14 جانفي (مُحَرَمْ


قمت نهارت الجمعة المبارك عملت قيام الليل و صليت الفجر و مشيت بحذا صاحبي معاوية كيما كل نهار جمعة و هاذا بعد ما ولاّ نهار عطلة باش لعباد تتفرغ للصلاة ! مشيت بحذاه لقيت مرتو الثانية رابعة تكنس قدّام الدّار و طرف من شعرها ظاهرة و العياذ بالله ياخي قلتلها استر روحك اختي كان يراك راجلك تو تقوم القيامة ! قتلي بارك الله فيك تفضّل لداخل هاو عدّك بيه جا مالجامع ! ادخل هاوكي ضرّتي مطيعة لداخل تو تضيّفك ، سمّيت بسم الله و دخلت نلقا مرت معاوية الرّابعة فاطمة نور الهدى ترضّع في ولدها ابي العلاء قلتلها اختاه استر روحك يعيشك ! دخلت للبيت و قاتلي هاي ضرتي خديجة تو تضيفك اخي الكريم ! جابتلي الاخت خديجة الضيافة غزرت ليديها نلقاهم عريانين ! قلتلها اختي هكّا تقابل الضيوف و كفّاك مكشوفان ؟ تحشمي هداك الله ! قاتلي عذرا اخي محبيتش نبطا عليك بالضيافة جيتك نزرب و نسيت قفّازاتي ! جاء معاوية مالجامع و فرح بيا كيلعادة قتلو خويا قول لنساك الاربعة يتحشمو شويّا ! قلي علاه شعملو ؟؟ قتلو وحدة تسيّق و طرف من شعرها ظاهرة و وحدة دخلت نلقاها ترضّع في ولدها في الصالة و لخرى يديها ماغير قفّازات ! قلي تو نوريك فيهم خويا و سامحني على هالحشمة كان جيت هوني وقتها راني ربّيتهم من الاول و جديد ! قتلو ميسالش خويا محسوب مالعايلة راني اما و ما على الرسول الا البلاغ و هاني قتلك اللي ريتو باش تتصرف معاهم ! نمشي نقضي قضية الدّار للنّسا ايا استودعك الله خويا ملتقانا في الجامع ! السّلام عليكم 


انا رُبَيعة بنت رشد مسلمة قاطنة بالخلافة الاسلامية تونستان 


نهار الاثنين نظّفت داري انا و ضرّاتي و طيبنا فطور لراجلنا و غسلتلو سقّيه و استأذنتو باش نمشي نطل على جارتي فجر الاسلام ، مشيت بحذاها نلقى بنتها شريفة واقفة بحذا الشباك و شعرها مكشوف قلتلها هكّا تخلّي بنتك ؟ قتلي خلّي يراها بوها تو يذبحها و كمّلت طلعتلي بطلعة جديدة ! قلتلها شنيّة ؟ قاتلي الطفلة تحب تمشي تقرى في مدرسة عمومية و العياذ بالله ! وووه ؟؟ ريت اختي ريت ! درا شكون قلّها راهم قبل كانو يقراو ولاد و بنات مع بعضهم ، راهي ضرّتي منيعة قالتلها تحب تفسّدلي الطفلة ! و شنوّة قلتلها انتي ؟ قلتلها المدارس كلها كفر و فساد و تعلّم الالحاد و التمرّد عالاسلام .. اسمع اخطانا من هالهدرة ليوم سمعت فمّا مرا باش يرجموها خاطر راوها تحكي معا جارها و وجها مكشوف و راجلها موش فالدّار هيّا نمشيو نتفرجو ؟ ايي و فمّا زادة واحد لقاوه يغزر لمرا من شباك دارها ا ستغفر الله باش يقلعولو عينو ، هيّا نشاور راجلي و نمشيو !


تحبّوها هكّا ؟؟

مرا و كلمتي هيّ سلاحي

هايمة في بلاد العميان ، كلاني النّسيان ، هزّتني الوديان ، 
ماقيت لشكون نشكي همّي ، 
ماقيت شكون يفسّرلي شصاير في هالبلاد 
زعمة كنت في غيبوبة و قمت ؟
 قمت نلقى روحي لا نعرف ويني و لا وين كنت 
قمت نلقى البلاد تقسمت نصّين 
نص يحب عالمساواة في ممارسة الدّين 
و نص يحب البلاد بلاد مسلمين 
مشيت معا النص اللول لقيت فيهم عباد متناقضين 
تنادي بالحرّية و المساواة و عدم التمييز و احترام الاديان 
و هوما بينهم و بين بعضهم لا يهمّهم لا ربّ لا دين 
قالولي معانا انتي مرا حرّة مايغصبك حد على شَي
تلبس ولاّ تصلّي والا لا حياتك و لا يحكم فيك لا ميت و لا حيّ 
مشيت معا النصّ الثّاني نلقاهم عباد رجعيّين 
يحبّو عالخلافة و يشوهو في الاسلام و الدّين 
ناس ميش فاهمة شي و تحب يحكمها عباد سلفيين 
ناويين يردّو البلاد كيما ايران و افغانستان المقهورين 
يحبّو ينشرو ثقافتهم على حساب الدّيانات لُخرين 
و كي يجي شكون يحكي معاهم و يقول لا للاسلاميين 
يكفّروه و يقولو اقتلوه فهو من اللائكيين 
عباد هازّين البلاد للهاوية و عباد تبّع فيهم و موش عارفين علاش قادمين 
ردّو الجوامع مدارس سياسيّة و الشّوارع تلمّو فيها المصلّين 
يحبّو المرا تلبس نقاب ماكانش راهي من الظّالّين 
يحبّو الرّاجل ياخذ اربعة نسا 
وحدة بونيشة ، الثانية طباخة ، الثالثة ترضّع و الرّابعة على رحمة الوالدين 
يحبو المرا تشد الدار قال شنوّة القراية و الخدمة للرجال موش للنساوين 
يحبو البلاد خلافة يشدها رشودة زعيم الارهابيين 
اللي حقر المرا و ردّها من منزلة المساجين 
بلادنا قاعدة تضيع و حد ماهو عارف وين ماشين 
انا مرا تونسيّة و عندي رايي و كلمتي وحدة موش ثنين 
بلادي عندها عليّا حق ! باش نقوول لا للهمجيين 
لا للي مايهمهم كان في رواحهم و يحبو يرجعونا اسفل سافلين 
لا للي حقرو المرا و قهروها و رجعوها لعصر الجاهلين 
لا للي يحب يسكّتني و يردّني عورة باسم الدّين 
انا مرا و بلادي هيّ بلادكم 
انا مرا و حقوقي هيّ حقوقكم 
مرا و عندي كلمتي و صوتي اللي باش نصوّت بيه 
لعباد تستحق موش لعباد عالسّلطة ملهوفين 
عباد توقّف لبلاد على ساقيها و ترجع تونس .. لجميع المواطنين ...

نهقاوي فخور

نهضوي و افتخر 
باش تفتخر بجاه اللي خلقك ؟ 
افتخر بحبّي لبلادي و ديني و للشّيخ راشد الغنّوشي 
فرحان بروحك تحب واحد قلّاب فيستا سكيزوفرين ، فجّر وتلا في سوسة و المستير في الثمانينات و تو جاي يتمحّس قال شنوّة احنا بشر و نغلطو 

قال عاللائكيّة معارضة للدّين و الشريعة و بعد جاي يحكي عليها و يفسّر في معناها و قال ماهيش معادية للدّين 
و انتي واللي كيفك تبعو فيه كي العلالش هاززكم الرّيح ، اللي يقولو صدق رشودة العظيم 
تحبّو تعملوه خليفة والا امير المؤمنين علاه ؟ بانا صفة ؟ 
اللي يقلكم لا للاسلاميين تكفّروه ، برّا اقرا الفرق بين المسلم و الاسلامي و ثقّف روحك تو تفهم 
تبعو في جماعة يحبو يقصّو يد السّارق ، و يقلّعو عين اللي يغزر لمرا 
و يجلدو الزّاني و يرجمو المتبرّجة و يفجّرو البارات و الوِتلا تحت اسم الجهاد في سبيل الله 
تبّعو في جماعة عملو مالجّوامع منابر سياسيّة 
يجيو للعزايز الامّيين و يقولولهم صحّو على ورقة فحواها "نعم لتونس اسلاميّة" 
جماعة يحبّو يعملو مدارس غير مخطلطة 
جماعة يحبّو المرا تشد الدّار و تخدم راجلها و صغارها قال شنوّة البطالة مستفحلة و الراجل اولى بالعمل و على راسهم راشد الغنّوشي 
و هوّ زادة اللي عرّف المرا في كتاباته على انّها اداة جنس بحتة ، انّها المغرية و المثيرة لغرائز الرّجل 
تحب بلادك ؟ كيفاش تحبها وانتي تبّع في ناس تحب ترجّعنا لعصر الجهل و الافكار السّلفيّة ؟ عاد نتوما صرفتو صرفتو نكمّلو نرجّعوها صحرا و نركبو عالحصونة و الجمال واحنا رايضين ! 
فيق عيش خويا كان تحب بلادك و دينك بالرّسمي خلّي دينك لروحك و خلّي العباد رايضة و برّا اقرا على تاريخ جماعة النّهقة المسوّد قبل ماتايّدهم و تجي معاهم ..و ديما نرجع و نقول : 
رشودة يا صنديد 
تحب تولّيلنا خالد ابن الوليد ؟
و الا طامع بش تولّي هارون الرّشيد ؟
راك في تونس ماكش في يثرب ولا غار حراء 
جاي من بلاد الڨورّة بش تردّ الرّاجل ياخذ اربعة نساء
فيق يا حاج راك ارهابي 
تطلع ولا تهبط عمري مانحلّك بابي 
فرحان خاطر جماعة خوامجيّة يبشبشو بيك ؟
هاكم اقليّة والباقي القاعة باش يمسحوها بيك 
برّا عيشك اغسل ساڨيك و ارڨد 
رتّحنا من همّك و تجغجيغك اللي يكفّر و يعڨّد

المرا التونسيّة

المرا التونسيّة هي سارة العيّاشة و خالتي محرزيّة  !

 هي اللي خلّات صغارها في الدار و خرجت باش تطرّد الجبّار !

 هي اللي سهرت في الصبيطار بحذا ولدها اللي كلا على راسو 

 هي اللي بكات و بدموعها سقات النّوار اللي حطّتو على قبر راجلها اللي كان مالثّوار !

 هي اللي كبرت رجال و قعدت تصرف عالمهندس و البطّال  

هي الطفلة اللي قرات و فرّحت والديها بشهادتها ،

 هي المحامية و الطبيبة و بنت الدّار ،

 هيّ السّهارة و العيّاشة ،

 هيّ المدّينة و المصلّية ،

 هيّ اللائكيّة و هي اللي ما عرفت في حياتها كان الشريعة الاسلاميّة ،

 هيّ امك و اختك ، بنتك و مرت ولدك ،

 هي اللي خرجت في الثورة و قالت ماناش ساكتين ،

 هي اللي كتبت مقالات و قالت  سلاحي هوّ التدوين ،

 هي زادة بنت الليل ،

 اللي تبيع في روحها باش تاكل

 اما زادة باش تحميلنا بناتنا من الخطف و الاغتصاب و ڨحطة الرجاجيل !

 هي المرا الحرّة اللي دافعت على كرامتها بيديها ،

 هيّ الجاهلة اللي عاشت الفقر و عمرها ما ذاقت العزّ ، 

هي القارية المثقفة اللي بنات روحها بروحها ، 

هيّ اللي خلّات دارها و مشات على سقّيها من الجنوب للعاصمة ،

 هيّ اللي قالت لا و الف لا للظلم يا حكومة الحشمة  ،

 المرا التونسيّة هي اللي دافعت على دينها

 و هي اللي عبرت على رايها و قالت الحل في العلمانيّة ،

 هيّ اللي قالو عليها ملاّ جاهلة و سلفيّة

 و قالو عليها مالا كافرة و يهوديّة ،

 هي اللي شيوخ الجهل و الرّجعيّة يحبو يسكتوها و يدفنولها الهويّة

 و هي اللي دافعت على حقوقها و قالت لا لترك القضيّة !

 المرا التّونسية كانت و مازالت و باش تقعد مثال للمرا الحربيّة ، الكاملة ، المثاليّة ..

التّونسي واللائكية

تونسي كلّم خوه التّونسي : 

ـــ شعندك تعمل ليوما ؟ 

ـــ و للاّهي هاو فمّا مسيرة يناديو فيها بحرّية المعتقد و المساواة و كلّ 

ـــ آآه مالا هاك طلعت مع اللائكيّة 

ـــ استغفر الله العظيم قالّو لائكيّة و العياذ بالله 

ـــ مالا شنوّة تسمّيها هالمسيرة ؟

ـــ تي وين نعرف ! قالوي فمّا مسيرة قلت خلّيني نمشي 

ـــ مالا هاك طلعت ماشي لمسيرة لتكريس العلمانيّة في البلاد 

ــــ يا ولدي يهديك قالّو علمانيّة ! وقتاش طلعت هاذي ؟ طول عمرنا دينا الاسلام ! دين محمّد ! دين امّي و بابا ! نجي تو و نولّي نحب على هالعلمانيّة ؟ بطلت مانيش ماشي ! هاو باش نكلّم لولاد و نمشيولهم هالكفّار ! 

ـــ باهي قبل ماتمشي خلّيني نسئلك ! شماعناها علمانيّة ؟ 

ـــ كفر بدين الله عزّ و جلّ ! جات بيها لوروب و امريكيا عدوّة الاسلام ! كمشة فروخ يحبوها تولّي في تونس ! مالّا ريق !

ـــ بربّي شكون قالهولك هالكلام ؟ 

ـــ لولاد 

ـــ و هالولاد شكون قالهولهم هالكلام ؟ 

ـــ ماو راهم سمعوه فالتّلفزة ! و زيد برشا شيوخ كبار و معروفين قالو اللي هاللائكيّة كفر و الحاد ! 

ـــ باهي مالا خلّيني نفسّرلك شنيّا و انتي احكم ! انا مسلم كيفي كيفك و انتي تعرفو الشّي هاذا ! اما نأيّد العلمانيّة ! ياسيدي العلمانيّة معناها فصل الدّين عن الدّولة و عالحياة السّياسيّة ، و برشا عباد توقف عند المفهوم هاذا و تحكم عليها بالكفر و الالحاد ! كيفك انتي حكمت عليها وانتي ماتاعرفهاش شنيّة ! فصل الدّين عالدّولة موش معناه اقصاء الدّين ، اما معناه فصل الدّين عالسّياسة معناها مانعملوش مالدين (الاسلام والا غيرو) سياسة ! الدّين اختيار شخصي و ممارسة شخصيّة و اللائكية تضمنلك حقّك في ممارسة دينك الاسلام و ديانات عباد اخرين عايشين كيفنا كيفهم في هالبلاد ! اللائكيّة ما تجبركش باش تكون مسيحي والا يهودي والا حتّى ملحد ! هيّ حرّيتك و حرّية غيرك ! 

ـــ ايه اما تونس مسلمة من قديم الزّمان باش نجيو تو نردّوها علمانيّة ؟

ـــ يا خويا ياخي تونس عبد ؟ لحم و دم باش يكون عندها دين ؟ هيّ بلاد يعيشو فيها عباد كل واحد عندو دينو ! صحيح الاسلام هو اكثر ديانة موجودة فالبلاد اما زادة فيها مسيح و يهود و ملحدين زادة ! كي نقولو احنا راهي تونس دينها الاسلام ، المسيحي شنوّة باش يحس ؟ اليهودي شنوّة باش يحس ؟ باش يحسّو رواحهم ماهمش من هالبلاد اللي هيّ بلادهم كيما هيّ بلادنا ! باهي خلّيني نسئلك سؤال ، تحب انتي شكون يجي يقلّك : باش تنتمي للدّيانة المسيحيّة والا غيرها بالسّيف عليك ماكانش نطردوك ؟

ـــ بالطبيعة لا 

ـــ كي تبدا انتي مسلم مولود و عايش في الاوروب و هوما اغلبيّتهم مسيح كيما تعرف ، و يخرجو في مسيرات و يقولو بلادنا دولة مسيحيّة ماكش باش تحس روحك منبوذ ؟ وانتي عشت وتربيت غادي ؟ 

ـــ صحيح 

ـــ هاذا علاش هالعباد اللي ماشيلهم انتي و لولاد با' تطردوهم والا تضربوهم خرجو في هالمسيرة ، باش يناديو بمبادئ تضمنلك حقّك كمسلم و حق المسيحي و حق اليهودي و حق الملحد ، باش مايغصبهم حد على شي ، باش كلّ واحد يمارس دينو كيما هوّ يحب موش كيما العباد تحب ! و كي تجي تشوف اغلبيّة التّوانسة و انتي منهم مع العلمانيّة اما ماهمش شالقين ، كلّهم يحبّو عالحرّية في دينهم و طقوسهم ، ماهمش رافضين المبدأ اما رافضين الإسم ! هاني فهّمتك شنيّة اللائكيّة و نشالله تطلع فهمتني باش ماتغلطش فيهم هالعباد اللي في المسيرة وغيرهم و انتي دليلك ملك 

ـــ واللاهي فهمتك يا خويا يعطيك الصّحة ، هاو باش نعمل قهوة مع لولاد و نقوللهم هالكلام خلّي لبلاد تولّي ماخير بقدرة ربّي . سلام 

شعبك يا تونس ..

آآآآه يا تونس وين هازّك الرّيح ؟
على خاطرك طاح المقتول و الجريح
خرج الشعب و قال لا للدّيكتاتور 
بدمّهم و دموع والديهم صنعو ثورة تشهدلها العصور 
ترابك يا تونس طاهر بدمّ الشهيد 
شعبك كتب حكايتك عالحيط و ولاّ تراث جديد 
الشعب اللي قهرو الديكتاتور 
مات باش يخرّج صوتك للنّور 
مات و هوّ ينادي بالحرّية اللي تحرم منها 23 سنا 
كلا الضرب و الكفوف اما ماسكتش و قعد يقول لا 
قال لا للظّلم و الاستبداد 
قال لا للرّكوب على ثورة صنعوها ولاد البلاد 
كان ساكت اذ تكلّم ياكل المتراك و يقعّدوه عالدّبوزة 
و شكون كان يحسّ بيه ؟ كان الشّايب و العزوزة
اللي جابو ولاد تونس الاحرار 
اللي بيديهم و افكارهم طرّدو الجبّار 
اما بعد هاذا الكل شنوّة صار ؟
العباد فهمت الحرّيّة بالغالط و ردّو معناها الاستهتار
الخدّامة تحب زيادة فالشهريّة و الزوّالي فالكيّاس بنا دار 
البوليسيّة عملو اعتصام و السّراق هدّو عالدّيار 
ولاّ انفلات امني و الكلوشارات و النطّارة ولّاو شاطح باطح 
و بعد هاذا شنوّة صار ؟ 
تلمّت العباد في القصبة اللي ولّات رمز الصمود 
جا المحامي و المهندس و البنّاي و العيرود 
جا عم الهادي و خالة تِبر و ولدها مسعود 
و قالو مانروّحو كان ما تحقّولنا الوعود 
و صار اللي حبّو عليه و قالو اذا عدتم سنعود 
و بعد هاذا شنوّة صار ؟
جات عباد تنادي بالخلافة الاسلاميّة 
و عباد تنادي بالّائكيّة العلمانيّة 
عباد تحكي باسم الاسلام و تقول تونس دولة اسلاميّة
يا تونس جاوبني انتي بربّي انتي عبد باش يبدا عندك دين ؟ 
والا انتي بلاد فيها برشا ديانات و معتقدات و منها الشريعة الاسلاميّة ؟
يا تونس شعبك اللي حرّرك هوّا بيدو تقسم و ولّا كلّ واحد يحب يردّك متاعو 
ويني الحرّية وقت خرجت العباد تعبّر على رايها و اللي ماعجبوش الكلام شمّر على ذراعو ؟
وينو الشعب الموحّد وقت عباد حكاو عالعلمانيّة ردّوهم اهل الكفر و الماسونيّة ؟
ويني حرّية التّعبير وقتلّي الواحد كي يعبّر يكفّروه ؟
كي يحكي يسكّتوه 
كي يجي قدّامهم يطردوه 
كي يبدا مسلم اما موش بمفهومهم هوما ينبذوه ...
يا تونس ياللي ماشية للهاوية
ياخي هالعباد على شنوّة ناوية ؟

Logique Paradoxale: قالو .. قلنا

Logique Paradoxale: قالو .. قلنا: "عباد نادات باللائكيّة و عباد قالت هذا كفر و تونس امّة اسلاميّة. قالوا اللائكيّة الحاد و الخلافة هيّ الحرّية . ويني الحرّية اللي تحكيو عليها ..."

قالو .. قلنا

عباد نادات باللائكيّة و عباد قالت هذا كفر و تونس امّة اسلاميّة. قالوا اللائكيّة الحاد و الخلافة هيّ الحرّية . ويني الحرّية اللي تحكيو عليها يا قوم الجهل و السّلفيّة ؟ حريّة الرّاجل كي ياخذ اربعة نساء و ياذنوبي كان نجّم يعدل مابيناتهم ؟ والا حرّية المرا في انّها تلبس نقاب و تولّي بونيشة ؟ حريّتكم باش تلقاوها عند رشودة الصّنديد ؟ 

ولا تحبّو تقيّمو هارون الرّشيد ؟ عجبكم الدّستور كي قال تونس جمهوريّة ديمقراطّية دينها الاسلام ؟ ياخي تونس مافيهاش يهود و مسيح و ملحدين ؟ يموتو هوما باش نتوما تلقاو الحرّية اللي تحكيو عليها ؟ تحبّو تنحّيو مجلّة الاحوال الشخصيّة اللي حمات حقوق الانسان و الطفل و المراة و هاذا زادة ردّيتوه كفر و الحاد ؟ تحبّو تعيشو في حضن راشد اللي كان نسيتو شعمل فالبلاد قبل احنا ما ننساوش ! ما تحشموش عاملين من ارهابي رسولكم ؟ ماشي فيبالكم باش يحفظكم و يصونكم ؟ 

واحد مجرم قلاّب بش يحميلكم حقوقكم و يحافظلكم على دينكم ؟ فيقو يا عباد راكم هازين البلاد للهفهوف ! تحبو تعيشو كيما في ايران في القهر و الخوف ! آآاه يا تونس شعبك اللي مات باش يحررك خلّا وراه عباد باش تدمّرك ! هربنا من ديكتاتور باش نطيحو في حجر واحد طرطور ! يا علمانيين ياللي حقروكم ، يا لائكيّين ياللي شلّكوكم ، ياللي ناديتو بالحرّية و كفّروكم ، ياللي حبيتو تحميو حقوق الشعب الكل ياخي ضربوكم و طرّدوكم ، ياللي ناديتو بالمساواة و حق كل واحد في ممارسة دينه بحرّية و بزقو عليكم ! ما تاقفوش ، كمّلو اللي بديتو فيه ، حتّى كان احنا اقلّية مايعنيش اللي احنا ماعنّاش شخصيّة ! باش نقعدو نعبّرو و ناديو باللي لازم يصير ! هوما يهدّو احنا نصلّحو ، هوما يضربو احنا نشكيو ، هوما يكسّرو احنا نبنيو ، ماناش ساكتين .. و فالاخير باش نقعدي نقولو تونس ليك تونس ليّا تونس لائكيّة علمانيّة ..