التّونسي واللائكية

تونسي كلّم خوه التّونسي : 

ـــ شعندك تعمل ليوما ؟ 

ـــ و للاّهي هاو فمّا مسيرة يناديو فيها بحرّية المعتقد و المساواة و كلّ 

ـــ آآه مالا هاك طلعت مع اللائكيّة 

ـــ استغفر الله العظيم قالّو لائكيّة و العياذ بالله 

ـــ مالا شنوّة تسمّيها هالمسيرة ؟

ـــ تي وين نعرف ! قالوي فمّا مسيرة قلت خلّيني نمشي 

ـــ مالا هاك طلعت ماشي لمسيرة لتكريس العلمانيّة في البلاد 

ــــ يا ولدي يهديك قالّو علمانيّة ! وقتاش طلعت هاذي ؟ طول عمرنا دينا الاسلام ! دين محمّد ! دين امّي و بابا ! نجي تو و نولّي نحب على هالعلمانيّة ؟ بطلت مانيش ماشي ! هاو باش نكلّم لولاد و نمشيولهم هالكفّار ! 

ـــ باهي قبل ماتمشي خلّيني نسئلك ! شماعناها علمانيّة ؟ 

ـــ كفر بدين الله عزّ و جلّ ! جات بيها لوروب و امريكيا عدوّة الاسلام ! كمشة فروخ يحبوها تولّي في تونس ! مالّا ريق !

ـــ بربّي شكون قالهولك هالكلام ؟ 

ـــ لولاد 

ـــ و هالولاد شكون قالهولهم هالكلام ؟ 

ـــ ماو راهم سمعوه فالتّلفزة ! و زيد برشا شيوخ كبار و معروفين قالو اللي هاللائكيّة كفر و الحاد ! 

ـــ باهي مالا خلّيني نفسّرلك شنيّا و انتي احكم ! انا مسلم كيفي كيفك و انتي تعرفو الشّي هاذا ! اما نأيّد العلمانيّة ! ياسيدي العلمانيّة معناها فصل الدّين عن الدّولة و عالحياة السّياسيّة ، و برشا عباد توقف عند المفهوم هاذا و تحكم عليها بالكفر و الالحاد ! كيفك انتي حكمت عليها وانتي ماتاعرفهاش شنيّة ! فصل الدّين عالدّولة موش معناه اقصاء الدّين ، اما معناه فصل الدّين عالسّياسة معناها مانعملوش مالدين (الاسلام والا غيرو) سياسة ! الدّين اختيار شخصي و ممارسة شخصيّة و اللائكية تضمنلك حقّك في ممارسة دينك الاسلام و ديانات عباد اخرين عايشين كيفنا كيفهم في هالبلاد ! اللائكيّة ما تجبركش باش تكون مسيحي والا يهودي والا حتّى ملحد ! هيّ حرّيتك و حرّية غيرك ! 

ـــ ايه اما تونس مسلمة من قديم الزّمان باش نجيو تو نردّوها علمانيّة ؟

ـــ يا خويا ياخي تونس عبد ؟ لحم و دم باش يكون عندها دين ؟ هيّ بلاد يعيشو فيها عباد كل واحد عندو دينو ! صحيح الاسلام هو اكثر ديانة موجودة فالبلاد اما زادة فيها مسيح و يهود و ملحدين زادة ! كي نقولو احنا راهي تونس دينها الاسلام ، المسيحي شنوّة باش يحس ؟ اليهودي شنوّة باش يحس ؟ باش يحسّو رواحهم ماهمش من هالبلاد اللي هيّ بلادهم كيما هيّ بلادنا ! باهي خلّيني نسئلك سؤال ، تحب انتي شكون يجي يقلّك : باش تنتمي للدّيانة المسيحيّة والا غيرها بالسّيف عليك ماكانش نطردوك ؟

ـــ بالطبيعة لا 

ـــ كي تبدا انتي مسلم مولود و عايش في الاوروب و هوما اغلبيّتهم مسيح كيما تعرف ، و يخرجو في مسيرات و يقولو بلادنا دولة مسيحيّة ماكش باش تحس روحك منبوذ ؟ وانتي عشت وتربيت غادي ؟ 

ـــ صحيح 

ـــ هاذا علاش هالعباد اللي ماشيلهم انتي و لولاد با' تطردوهم والا تضربوهم خرجو في هالمسيرة ، باش يناديو بمبادئ تضمنلك حقّك كمسلم و حق المسيحي و حق اليهودي و حق الملحد ، باش مايغصبهم حد على شي ، باش كلّ واحد يمارس دينو كيما هوّ يحب موش كيما العباد تحب ! و كي تجي تشوف اغلبيّة التّوانسة و انتي منهم مع العلمانيّة اما ماهمش شالقين ، كلّهم يحبّو عالحرّية في دينهم و طقوسهم ، ماهمش رافضين المبدأ اما رافضين الإسم ! هاني فهّمتك شنيّة اللائكيّة و نشالله تطلع فهمتني باش ماتغلطش فيهم هالعباد اللي في المسيرة وغيرهم و انتي دليلك ملك 

ـــ واللاهي فهمتك يا خويا يعطيك الصّحة ، هاو باش نعمل قهوة مع لولاد و نقوللهم هالكلام خلّي لبلاد تولّي ماخير بقدرة ربّي . سلام